SEDANE SENTANU

Jejer Ngastina

Prabu sentanu diadhep putra Dewabrata, Patih Simahandaka, lan para wadya, lan ngendika menawa Dewabrata bakal dijumenengake dadi Ratu Ngastina. Dewabrata matur yen satemene kang pantes jumeneng nata iku Abiyasa. Sang Nata bingung. Pungkasane kang bakal dijumenengake ratu yaiku Raden Astabrata (putra patutan saka Dewi Durgandini). Dewabrata diutus ngaturi Matswapati saperlu nyekseni  . dewabrata budhal.

Ing Wiratha, Matswapati menggalih apa kang ndadekake Abiyasa durung dijumenengake dadi ratu ing Ngastina. Dewabrata sowan lan matur menawa  Matswapati kaaturan tindak Ngastina saperlu nyekseni jumenenge Astabrata dadi ratu. Matswapati duka lan ora bakal rawuh ing Ngastina. Dewabrata meksa, wusana malah dadi perang antarane Dewabrata lan Raden Seta, banjur dipisah dening Patih Simahandaka. Dewabrata didhawuhi bali menyang Ngastina.

Ing Ngastina, Dewabrata matur apa kang wis kalakon. Sentanu dhawuh marang Dewabrata supaya sowan ing Wukir Retawu, ngajak Abiyasa melu sayembara perang ing nagari Purwacarita. Dewabrata budhal lan satekane ing Wukir Retawu matur dhawuhe sang Nata. Abiyasa mituhu banjur budhal. Lakune ing dalan kepapag dening raseksa saka Taratebang banjur perang.

Ing Negara Purwacarita, Prabu Maduretna nampa lapuran saka para wadya menawa papan sayembara wis dadi. Para ratu sewu nagari wis padha teka lan sayembara diwiwiti. Nanging pungkasane ora ana kang bisa ngalahake Raden Nagapaya. Prabu Maduretna kang nampa lapuran mangkono banjur salah panampa. Piyambake ngira yen Raden Nagapaya arep ngalap sedulure dhewe. Raden Nagapaya rumangsa kadakwa tumindak ora bener. Nagapaya banjur pamit lunga saka Negara. Tekan tengahing alas, Nagapaya rumangsa wiring banjur arep golek pati. Nanging Bathara Narada ngelingake yen dalan iku ora prayoga. Narada ngaturake dhawuhe Bathara Guru supaya Nagapaya luwih becik tapa madeg pandhita ana ing Argabelah, peparab Begawan Bagaspati. Nagapaya budhal.

Prabu Maduretna nalika miring kabeh ature Ambiyakusuma ngenani Nagapaya banjur kaget. Dumadakan raja raseksa jumedhul saka ngisor lemah, ngadhep Sang Prabu, nuli nyuwun putri Sang Prabu. Wusanan sang putri diparingake.

Sawise iku Dewabrata lan Abiyasa sowan ing Purwacarita, nedya arep melu sayembara perang. Dewabrata lan Abiyasa banjur mungsuh Arimuka lan Wahmuka kanggo gantine Nagapaya. Dewabrata lan Abiyasa anggone perang nganti judheg amarga Arimuka Wahmuka ora bisa dikalahake. Semar matur supaya arimuka Wahmuka dibalang bathok bolu isi kunir welat. Abiyasa nurut parentahe Semar. Wusana Arimuka Wahmuka malih dadi kawah lan ari-ari. Dewabrata lan Abiyasa matur marang Prabu yen wis bisa ngalahake Arimuka Wahmuka, banjur Ambika diparingake marang Dewabrata. Dewabrata matur yen Ambika dititipake ing Purwacarita dhisik, nanging Ambika ora gelem. Wusana Ambika melu menyang Ngastina.

Ing dalan Dewabrata ngakon Ambika supaya bali dhisik menyang nagarane. Ambika tetep ora gelem. Dewabrata meksa kanthi nyekel jemparing. Ananging apese jemparing mau mrucut, Ambika ketaman jemparing banjur sirna. Dewabrata ngrungkebi lan rumangsa salah, dumadakan keprungu swara kang ngandharake menawa ing tembe ing prang Bharatayuda arep males ukum. Dewabrata bingung banjur karawuhan Bathara Narada, kang dhawuh menawa iku wis garising Gusti. Dewabrata ora diparengake bali Ngastina, nanging kadhawuhan tapa madeg pandhita ing Talkandha peparab Begawan Bisma. Dewabrata nurut dhawuhe Bathara Narada.

Ing Ngastina Sentanu ngarep-arep Dewabrata lan Abiyasa. Dumadakan Abiyasa rawuh nggawa Ambiki lan matur kabeh kang wus kelakon. Sang Prabu banget menggalih Dewabrata. Sentanu dhawuh marang Abiyasa yen Ambiki bakal diparingake Raden Astabrata. Abiyasa ngaturake Ambiki. Santanu dhawuh maneh Manawa Ngastina bakal diparingake marang Astabrata. Abiyasa duka, suwe-suwe dadi gelut. Abiyasa kalah lan mlayu menyang Wiratha.

Ing Wiratha Abiyasa ngrungkebi pamane lan matur apa kang wus kadadeyan. ,atswapati duka lan dhawuh supaya nyiapake wadya bala saperlu nglurug Ngastina. Ing Ngastina Matswapati sawadya bala kalah. Raden Abiyasa nimbali Semar, nyuwun pirsa bakal kepiye kedadeyane. Semar nuli munggah kahyangan, ngadhep Bathara Guru, nedya sedane Sentanu. Bathara Guru ora duwe wewenang. Sang Hyang Wenang rawuh didherekake Bathara Wisnu. Hyang Wenang banjur dhawuh marang Bathara Wisnu supaya mudhun menyang ngarcapada saperlu nyendhal mayange Sentanu.

Ing Ngastina, Sentanu dhawuh marang Ambiki kang isih nggarbini supaya nurut dhawuhe. Sentanu banjur manjing jroning guwagarbaning Ambiki lan diwejang aji  jayakawijayan. Sang Hyang Wenang kang pirsa tingkahe Sentanu dhawuh marang Wisnu supaya manjing guwagarbane Ambiki. Jabang bayi kang wis diwenehi aji-aji dening Sentani nuli direka supaya ing tembe dadi manungsa cacat wuta.

Sentanu banget sungkawa nalika pirsa yen nampa dukane dewa.Sang Hyang Wenang kang didherekake para dewa paring duka marang Sentanu amarga tumindak kang nerak aggger-angger. Sang Hyang Wenang dhawuh marang Bathara Wisnu supaya nyendhal mayang jiwane Sentanu. Bathara Wisnu mateg aji Jalasutra sinambi nyendhal jiwane Sentanu. Sanalika Sentanu sirna, kuwandha dilebokake kawah Candradimuka.

Bathara Guru nimbali Astabrata, banjur dipundhut menyang Suralaya kanggo njangkepi dewa.  Ing Ngastina, Matswapati misudha Raden Abiyasa jumeneng nata ing Ngastina jejuluk Prabu Kresnadipayana lan nggarwa Ambiki dumadakan ing jaba mungsuh teka, banjur perang. Raden Seta nandhangi, para raja sewu nagari padha kalah. Sawise iku kabeh padha suka andrawina.