PIWELING

Dening : JFX Hoery

Aku mung bisa gedheg, nalika suwara iku bali

Sumriwing

Swara tuwa, antep metu saka lesane simbah

Pitutur pindha sembur kang ngusap badan sakojur

Le, putuku coba delengen kae langit

Biru nanging sejatine tanpa rupa

Cedhak tan bisa ginrayang, adoh tanpa wewangenan

Apa bisa kowe dadi kaya langit kae

Yen bengi lintang-lintang padha gegojegan adum tresna

Eremna mripatmu sauntara, banjur elekna

Eningna pikirmu sauntara, banjur rasakna

Pithatana saben pletiking wektu

Kowe bisa nglakoni?

Wolak-waliking jaman kang sinebut cakramanggilingan

Setitekna awit lairmu tinengeran jenang abang

Tangismu nalika metu saka guwagarbane biyung

Guyu kasukan sakiwa tengenmu ora mbokpaelu

Nanging ing tembe pungkasane laku

Nalika kowe mesem gumuyu ing ngayunanNE

Ganti sakiwa tengenmu nangis sineksen langit

Mangkono iku jantraning manungsa

Kowe bisa ngerteni?

Jaganen kasunyatan, piwelinge simbah

Jamane wis tuwa jagade saya ciyut

Setitekna sandining leluhur

Kang sinamun ing tulis pepethingan

Enggonana wewaton-wewaton senajan ora katon

Ing kono sumimpen pagedhongane laku lakon

Lamun linakonan kanthi madhep manteping karep

Bakal dadi gantunganing urip kang sejati

Eneng-ening sumarah lane ling

Meper mubaling rasa ati

Ngesthi budi ing sandyakala

Dadia pratandha kasampurnan

Kowe bisa ngecakake?

Tenggok ngondhok-ondhok

Piwelinge simbah dakpundhi

Senajan abot mbentoyot

Aku ora suwala.

Jayabaya No 16, Minggu katelu, Desember 2011