Drama/ Sandiwara

Skenario utawi naskah drama inggih menika karangan ingkang wosipun cariyos utawi lakon dumados saking pinten-pinten babak. Saben babak kaperang dados pinten-pinten adegan. Saben adegan dipunwatesi dening ewah-ewahanipun swasana, panggenan, wekdal utaei dumuginipun paraga sanesipun.

Naskah ngemot dialog, kahananipiun panggung ingkang dipunbetahaken (lampu, rias, busana, iringan)kalebet katrangan ngenani kawontenan utawi swasana, watak, saha tingkah lakunipun paraga. Pacelathon ing naskah dipunwastani dialog. Dene katrangan ingkang dipunserat salebetipun tandha kurung dipunwastani pandom utawi kramagung.

Menawi badhe nyerat naskah sandiwara kedah migatosaken bab-bab ing ngandhap menika.

1.      Tema

Tema inggih menika gagasan ingkang dados dhasar lakon.

Rikala nyerat naskah sandiwara wonten pitakon, “perkawis menapa ingkang badhe dipuncariyosaken ?” wangsulan saking pitakonan menika ingkang dipunwastani tema.

2.      Alur

Alur menika urut-urutaning cariyos ingkang ngandhut hukum dramatik.

Kedah dipunmangertosi, alur drama menika kaperang dados enem tahap, inggih menika:

a.       Eksposisi, ing tahap menika ingkang mirsani dipuntepangaken kaliyan lakon sandiwara ingkang badhe dipunparagakaken

b.      Konflik, paraga drama wiwit ngalami perkawis

c.       Komplikasi, perkawis nuwuhaken konflik ingkang sansaya kathah lan ruwet

d.      Krisis, inggih menika puncak saking konflik/masalah

e.       Resolusi, konflik sampun milai saged dipuncekapaken

f.       Keputusan, sedaya perkawis sampun saged dipun cekapaken lan sekedhap malih cariyos purna.

3.      Penokohan

Penokohan mujudaken corak ingkang nggadhahi ciri dhateng lelampahan. Saged kaperang dados tokoh antagonis, protagonis lan ugi tritagonis.

4.      Latar utawi setting ingkang nyakup aspek ruwang, wekdal, saha gerak (dumadinipun kedadosan) ingkang kedah dipun jumbuhaken kaliyan kawontenan utawi situasi lan kondhisi medhia pementasan.

Apresiasi drama/sandiwara

Apresiasi inggih menika kesadharan tumrap nilai seni lan budaya utawa pambijen/ pangajen tumrap menapa kemawon. Ngapresiasi inggih menika nindakaken pengamatan, pambijen lan pangajenan. Wondene apresiasi drama inggih menika kegiyatan ingkang mbahas babagan tema, amanat, gaya bahasa, lan kaendahan basa ingkang dipunginakaken tuwin menapa kemawon ingkang wonten gandheng cenenge kaliyan drama/sandiwara.