orek-orekan gurit

Kucing

Kucing iku kewan kang cinipta dening Gusti

Nyenengake kang nyawang

Digendhong dielus-elus dening bocah-bocah cilik apadene bocah gedhe

Kucing iku kewan kang nrima ing pandum

Pakanane mung sega karo rese

Ewadene iku wae mesthi dientekake

Kucing iku warna-warna jinise

Kucing wulu kuning, kucing wulu soklat, wulu klawu, wulu ireng, anggora, 

kucing garong, kucing endhas ireng

Sik-sik, sajake kucing loro sing keri iku nyalawadi

Mripate mendelik golek memangsan

Gaweane bludhas-bludhus ing ngendi papan

Bank, kantor pamarentahan uga ora luput dadi inceran

Apa ya patut digadhang-gadhang

Yen digadhang polahe saya ndadra

Tingkahe gawe kapitunan liyan

Ngrusak tatanan

Wis, becike kucing loro iku digusah

Kareben lunga saka urip bebrayan

Murih tentreming alam panguripan

orekan gurit

Jamane Simbah lan Jaman Saiki

Bocah-bocah saiki ora kaya bocah biyen

Dituturi nyepelekake diomongi ora nggugu

Nalika aku takon kepiye larahane, simbah mangsuli

Jajal gatekna sakiwa tengenmu

Bocah-bocah enom padha pethakilan

Goncengan sikep-sikepan ing dalan

Ora duwe isin nganggo klambi bledhehan

Aku mangsuli

Menika sampun dados padatan mbah

Simbah ngeyel

Padatan kok adoh saka pranatan

Yen jamanku bocah-bocah isih padha ngggu wong tuwa

Ngungemi pranatan

Bocah lanang ora pethakilan

Bocah wadon alus bebudene

Yen ketemu padha isin-isin

Nanging ora ngisin-isini kaya bocah saiki

Aku ngeyel

Nanging boten sedaya ingkang tumindak kados ngaten mbah

Taksih wonten ingkang ngugemi dhateng tatanan

Simbah mangsuli

Ya iku kuwajiban kanggone sing wis bener

Kalebu kowe ngger

Kudu bisa ngelingake sing kleru supaya bali menyang pranatan

Aku meneng sawetara lan mikir

Pancen bener ngendikane simbah

Bakal dakcoba

orekan gurit

Iki manungsa kebak dosa

Semburat abang kang dumunung ing mega

Binareng angsluping surya katutup mega

Wus tekan titi wancine

Enggal lerenana kabeh pagaweyan

Kabeh pangandikan sarta ayahan

Tumuju ing daleme Gusti Kang Maha Wikan

Iki manungsa kebak dosa

Dosa kang tanpa pepindhan

Senajan sadhar tetep kaleksanan

Malah asring luput saka aturan

Nglalekake kuwajiban kang dadi tanggungan

Iki manungsa kebak dosa

Dosa marang sapadha-padha

Tumindak culika mring sasama

Kanepson sing nyebal saka pranatan

Kurang subasita lan tatakrama marang liyan

Kanthi sujud iki

Dakpasrahake jiwa lan raga

Nyuwun pangapura awit kabeh kaluputan

Kang wus dilakoni rikala semana